《Revisit張敬軒演唱會 》陪你過聖誕及新年

 《Revisit張敬軒演唱會》

由英皇娛樂主辦《Revisit張敬軒演唱會 》, 將於12月20至1月2日於灣仔會議展覽中心舉行十場演出！ 繼上年聖誕20週年演唱會同歌迷一齊過之後，今次軒仔準備為二十週年再做一個大總結，想同軒仔一齊再過歡樂聖誕及新年！留意啦，演唱會門票本月16 號-18號東亞銀行信用咭優先訂購，22號快達票公開發售！

題為《Revisit張敬軒演唱會 》，所以今次大會連海報都係飛機上面影！三年沒有上過機，無論軒仔及工作人員上到機都非常開心及懷念，軒仔重笑言話直頭有「陌生感覺」添。

張生今次飛去邊？勁啦，由紅館飛到過灣仔會議展覽中心，軒仔笑道，「係呀我今次飛灣仔，交通好方便，因為有東鐵線，哈哈。我地之前做完26 場二十週年演唱會，歌迷話我重有好多歌未唱，重想聽，所以見時間又ok ，好多方面都配合到，所以就決定不如一齊為呢個20週年寫上一個完美句號啦。 演唱會用《Revisit》，這個字中文解作舊地重遊。所以這個演唱會，我將帶領大家，用我的歌同大家一起重遊20年的回憶。對人對事對青春一齊來遊歷一次，我相信歌迷同我一樣，會有好多回憶。」

今次做三面台，軒仔謂他已經好幾年沒有做過三面台，都非常有新鮮感。「今次我地都好大制作，好重本。首先係音響方面，保証每一個觀眾會有聽覺上最高之享受，另外視覺上都會好靚，聖誕新年是開心日子，所以成個騷不會似上一次咁heavy，會歡樂好多。另外都一定唔會剩係唱 Side Track，雖然好多歌迷話好多 Side Track想聽，但係今次係重遊20週年的歌，所以經典的好聽的都會唱。」

今次海報是包了一個大形機艙拍攝場景，三年未上過飛機，軒仔話上機有點陌生感覺，不過他亦真的非常期待可以飛，所以一做完這個騷，他就會馬上飛去旅行。但這三年不能飛，他認為也不是很可惜，因為大家花多好多時間游歷香港這個地方，「呢三年大家睇多左香港本身好多靚風景。而且疫情都教會左我地好多野，人同人之間相處回憶變得好珍貴。」